تازه خبرونه

افغانستان لپاره د امریکا پخوانی استازی، زلمی خلیلزاد، وایي چې د مالیه ورکونکو بودیجه باید د امریکا ضد تبلیغاتو لپاره ونه لګول شي. نوموړي د ایلان ماسک د څرګندونو ملاتړ کړی او په خپل ایکس پاڼه کې لیکلي چې د «امریکا غږ» او «ازادي راډیو» فعالیتونه باید له نږدې وڅېړل شي.

د طالبانو ویاند، ذبیح‌الله مجاهد، هغه راپورونه ناسم بللي چې وایي پاکستان ممکن د داعش پر ضد د افغانستان په خاوره کې نظامي عملیات ترسره کړي.

د طالبانو دفاع وزارت له متحده ایالاتو څخه غوښتنه کړې چې هغه اووه «بلک‌هاوک» هلیکوپټرونه، چې تازه له ازبکستان څخه امریکا ته انتقال شوي، بېرته افغانستان ته وسپاري.

د امریکا د دفاع وزیر، پیت هګست، اعلان کړی چې له افغانستان څخه د امریکا د وتلو بهیر به وڅېړي، ترڅو معلومه شي چې کومې تېروتنې شوې او ولې تر اوسه هېڅوک ځواب ویونکی نه دی.

د برازیل د سائوپائولو ښار په یوه ګڼ مېشته سیمه کې د یوې الوتکې سقوط له کبله دوه کسان وژل شوي او تر اوسه د څو نورو کسانو د ټپی کېدو راپورونه ورکړل شوي دي. دا پېښه په ځايي وخت نن سهار رامنځته شوې او په خپاره شویو انځورونو کې لیدل کیږي چې یو بس هم د دې پېښې له امله اور اخیستی دی.

چین او پاکستان موافقه کړې چې د افغانستان د ثبات او له نړیوالې ټولنې سره د بېرته ادغام په برخه کې به خپلې همکارۍ پراخې کړي. د پاکستان د بهرنیو چارو وزارت په یوه اعلامیه کې دا خبر تایید کړی دی.

د سوریې موقت ولسمشر احمد شرع او د دې هېواد د بهرنیو چارو وزیر اسعد الشیباني نن سې شنبه «د سلواغې۱۶مه» د ترکیې له ولسمشر رجب طیب اردوغان سره پر ګډو نظامي همکاريو د خبرو لپاره انقرې ته رسېدلی دی.

کابل – د طالبانو اطلاعاتو او کلتور وزارت د ښځو اړوند د «بېګم راډیو» نشرات بند کړي دي. دا اقدام د ملا هبت الله د سخت دريځو پالیسیو د دوام یوه برخه بلل کېږي.

د طالبانو ویاند ذبیح‌الله مجاهد، د دوشنبې په ورځ په یوه آنلاین غونډه کې ومنله چې د طالبانو د رهبرۍ په کچه فکري اختلافات شته، خو ټینګار یې وکړ چې دا اختلافات د جګړې یا د طالبانو د نظام د ړنګیدو لپاره کوم ګواښ نه دي.

په افغانستان کې د ملګرو ملتونو د استازولۍ دفتر (یونما) تایید کړ چې په کابل کې د دې سازمان په دفتر کې د ډزو په یوه پېښه کې یو کس وژل شوی او یو بل ټپي شوی دی.