اوزبیکستان سفیر طالبان را به‌زودی می‌پذیرد

نخست‌وزیر اوزبیکستان می‌گوید که تاشکند در آینده‌های نزدیک سفیر طالبان را به گونه رسمی می‌پذیرد. 
طرز پرس: ارگ تحت کنترل طالبان با نشر خبرنامه‌یی گفته‌ است که عبدالله عارف‌اوف نخست وزیر اوزبیکستان در دیدار با مولوی عبدالکبیر معاون سیاسی نخست‌وزیر طالبان افزوده که اوزبیکستان در نشست‌های جهانی از موضع‌گیری طالبان حمایت و پشتیبانی می‌کند. عبدالله عارف‌اوف همچنان می‌گوید که اوزبیکستان بر گسترش همکاری‌های اقتصادی و بازرگانی با افغانستان متعهد بوده و هم‌کاری‌هایش را در بخش‌های معادن، برق، زراعت و بازسازی ادامه می‌دهد. بر بنیاد خبرنامه‌ی ارگ، نخست‌‌وزیر اوزبیکستان از آمادگی کشورش برای عملی‌سازی پروژه‌ی افغان-ترانس اطمینان داده‌است.